Sabbath Chu Chawlhna Nî leh Chibai Bûkna a ni

Ṭhenkhat chuan Sabbath hi engmah ti lova awm hahdamna ni an ti mai thin a. Inthlahrun ngai miah lovin kár tin nî khat chu hna te, tihtur hmáchhawp sa leh inchhûng sêkrèk khawih pumpelh ni atan nei angin han suangtuah chhin teh! Chhûngte leh ṭhiante nêna hun hman hote, ramhnuai hmun mawi tlawha chhuah vah vêl te leh mi dangte tâna thil ṭha tih te hi hautak viau angin a lang em?  Mahse, tak takah chuan chutiang a ni lo nia; kár tina hahchawlh nî, Sabbath, hi Pathianin a duan, thilsiam a nih laia mihring nena thlun zawm, mihringin a mamawh vanga Pathian siam a ni.

Pathian Din A Ni

Pathian thú chuan, “Tin, Pathianin ni sarih nîah chuan a thil siam chu a ti zo va: ni sarih nîah chuan a thil siam zawng zawng chu a chawlhsan ta a. Tichuan, Pathianin ni sarih nî chu mal a sawm a, a serh ta a: chu mi nîah chuan Pathianin a thîl siam zawng zawng, thu ngawta a siam leh kuta a siamte chu a chawlhsan tak avângin,” a ti a (Genesis 2:2,3). A chhan chu a ni sarih nîin LALPA a chawl a, chu chu chhuan zawng zawngte tâna ni thianghlim hriatrêng tura A rúahman a ni. Thusàwm pêk palinaah A sawi a, “Sabbath hi thianghlim taka serh tur a ni tih hre reng rawh,” tiin. Tin, “Ni rùk chhûngin i thawk tûr a ni a, i hna zawng zawng chu i thawk tûr a ni: a ni sarih nî erawh chu LALPA i Pathian tân Sabbath a ni e,” tiin (Exodus 20:8-10).

Sabbath Awm Chhan

Pathianin Sabbath hi chhan ṭha tak pahnih avânga rúahman a ni a: Thilsiam hriatrêngna atân leh kan chhandamna chhinchhiahna atân a ni. “Ni rúk chhûngin LALPAN lei leh vân te, tuifinriat leh a chhûnga awm zawng zawngte chu a siam a; tin, a ni sarih nî chuan a lo chawl ta si a: chuvângin, LALPAN Sabbath chu mal a sâwm a, a tithianghlim ta a ni,” tiin (Exodus 20:11). Tin, “Chu lo chu kei leh anmahni inkara chhinchhiah nân ka sabbath-te chu anmahni ka pe a, Kei hi LALPA anmahni serh hrangtu ka ni tih an hriat theih nân,” tiin (Ezekiela 20:12).

Hebrai thumala Sabbath tih awmzia chu, “châwl” tihna a ni. A thil siam hnathawhna zawng zawng aṭanga Pathian a chawl ang khan kan ni tin hnathawhna aṭanga chawl hahdam a, eng thil nge pawimawh tih ngaihtuah nawn lehna atân hman tùr a ni a. Tin, intuaithar lehna ni a ni. Sabbath serh hi kan rinna thil tih a ni a; eng thil pawh ti ila, Pathian thuhnuaiah a awm vék a ni tih min hriat nawntîr lehna a ni. Kar khat chhunga ni khat kan hnatawh chawlh nan kan serhhran hian hetiang hian kan sawi tihna a ni: “Aw Pathian, nangmah ngaihtuaha Sabbath nî ka hman mêk lai hian, ka nunna chak lo tak hi min enkawl la. Kár khatah ni rûk chhûng chauh hna thawk mah ila, ni sarih chhûnga ka mamawh chu min pe ang tih ka ring tlat a ni. Vawiin hian eng zâta tam pawh thawk chhuak thei dawnin, kár kaltaa ka thawh tùr hmáchhawp la tih zawh si loh awm țeuh mah se, vawiin hian ka rilru leh taksa chu nangmahah a chawlhahdam dawn a ni.”

Remchanna La Rawh

Mihringin mahni duh zâwng tihhmasâwn kan tumnaah hian, Thlarau lam ṭhanlénna hun remchâng, chatuan daih thil pawimawh tak takte ngaihtuah thar lehna hun ṭha kan la mamawh dâwn tih Pathian chuan a hre sa vék a. Chuvângin, Sabbath chu ni tin khawsak lungkhamna lak aṭanga inthiar fihlimna hun rémchâng a ni.

– Emily Thomsen